نظم : کرکٹ اور مشاعرہ جماعت نہم

  نظم : کرکٹ اور مشاعرہ

شاعر: دلاور فگار

صنفِ نظم بلحاظ موضوع:  طنز و مزاح

صنفِ نظم بلحاظ ساخت: پابند نظم

پابند نظم سے مراد ایسی نظم جو  باقاعدہ وزن، بحر اور قافیے کی پابندی کے ساتھ کہی گئی ہو۔ تمام اشعار ہم وزن ہوں اور قافیہ و ردیف

 کی ترتیب بھی برقرار ہو۔البتہ موضوع کے اعتبار سے یہ طنزیہ و مزاحیہ ہے۔

 سوال : نظم کرکٹ اور مشاعرہ کا مرکزی خیال لکھیے۔ 

جواب: اس نظم میں شاعر دلاورفگار نے کرکٹ اور مشاعرے کے درمیان دل چسپ اور طنزیہ مماثلت بیان کی ہے۔ وہ دکھاتا ہے کہ دونوں میدان تفریح، مقابلے اور قسمت کے کھیل سے بھرپور ہیں۔ نظم اس حقیقت کی نشاندہی کرتی ہے کہ یہاں بھی اور وہاں بھی اہلیت سے زیادہ نصیب اور موقع اہم کردار ادا کرتے ہیں۔ شاعر مزاح کے پیرائے میں ادبی اور سماجی رویّوں پر گہرا تبصرہ کرتا ہے۔

 سوال: شاعر دلاورفگار کے انداز کلام کی چند خصوصیات تحریر کیجیے۔

 جواب:1۔طنزومزاحکاعنصر : شاعر نے نظم میں نرم اور شائستہ طنز و مزاح سے کام لیا ہے۔ کرکٹ اور مشاعرے کے تقابل کے ذریعے وہ ادبی دنیا کی بعض کمزوریوں اور تضادات پر ہنستے ہنستے گہری بات کہہ جاتا ہے۔

2۔تشبیہات و تمثیلات کا استعمال: نظم میں کرکٹ کی اصطلاحات کو مشاعرے کے ماحول سے جوڑ کر خوب صورت تشبیہیں اور تمثیلات قائم کی گئی ہیں۔ اس انداز سے نظم میں دل چسپی اور معنوی وسعت پیدا ہو گئی ہے۔

3۔ مشاہداتی اور حقیقت پسندانہ انداز : شاعر کا انداز گہرے مشاہدے پر مبنی ہے۔ وہ مشاعروں اور کھیل کے میدان میں پائے جانے والے رویّوں کو حقیقت کے قریب رہتے ہوئے پیش کرتا ہے، جس سے نظم قاری کو زندگی سے جڑی ہوئی محسوس ہوتی ہے۔

 سوال: نظم کی مختصر تشریح کیجیے۔ 

جواب:

 شعر نمبر 1:  مشاعرہ کا بھی تفریح ایم ہوتا ہے   مشاعرہ میں بھی کرکٹ کا گیم ہوتا ہے

شاعر بیان کرتا ہے کہ مشاعرہ صرف ادب کا موقع نہیں بلکہ لوگوں کے لیے تفریح کا ذریعہ بھی ہے۔ وہ مشاعرے کو کرکٹ کے کھیل

 کے مترادف قرار دیتا ہے، یعنی دونوں میں دلچسپی، مقابلہ اور جذبہ پایا جاتا ہے۔

شعر نمبر 2: ۔ وہاں جو لوگ کھلاڑی ہیں وہ یہاں شاعر   یہاں جو صدر نشیں ہے وہاں ہے امپائر

شاعر کرکٹ کے کھلاڑیوں اور مشاعرے کے شاعروں کے کردار کا موازنہ کرتا ہے۔ جہاں کھیل میں کھلاڑی ہوتے ہیں، مشاعرے میں شاعر ہوتے ہیں، اور جہاں کھیل میں امپائر ہوتا ہے، مشاعرے میں صدرِ مشاعرہ اس کی جگہ لیتا ہے۔

 شعر نمبر 3: ۔ وہاں ریاض مسلسل سے کام چلتا ہے   یہاں گلے کے سہارے کلام چلتا ہے 

کرکٹ میں محنت اور مسلسل کھیل کی اہمیت ہے، لیکن مشاعرے میں بعض اوقات محض بلند آواز یا دکھاوے سے بھی کلام کو توجہ مل جاتی ہے۔

 شعر نمبر 4:۔ وہاں بھی کھیل میں نوبال ہو تو فاؤل ہے   یہاں بھی شعر میں اہمال ہو تو فاؤل ہے 

کرکٹ اور مشاعرے دونوں میں قواعد کی پابندی ضروری ہے۔ جہاں کھیل میں نو بال غلطی ہے، مشاعرے میں شعری غلطی یا معیار سے ہٹنا بھی قابل قبول نہیں۔

 شعر نمبر 5:۔ وہاں ہے ایل بی ڈبلیو یہاں یہ چکر ہے   کہ عندلیب مونث ہے یا مذکر ہے 

شاعر بیان کرتا ہے کہ کرکٹ کے  بعض قوانین بہت مشکوک ہوتے ہیں، جیسے ایل بی ڈبلیو آؤٹ کا فیصلہ جس پر پتا نہیں چلتا کہ کھلاڑی آؤٹ ہے یا نہیں۔ اسی طرح مشاعرے میں بھی قواعد اور عروضی تقاضے  ہوتے ہیں، جیسے الفاظ کی صنف  اور درستگی کی جانچ کرنا وغیرہ۔ مثلاً  لفظ عندلیب کا پتا نہیں چلتا کہ یہ مذکر ہے یا مؤنث۔

 شعر نمبر 6:۔ وہاں بھی صرف مقدر کا کھیل ہوتا ہے   جو  اَن لکی ہے یہاں بھی وہ فیل ہوتا ہے 

شاعر بتاتا ہے کہ کرکٹ اور مشاعرے میں قسمت بھی اہم کردار ادا کرتی ہے۔ بعض اہل لوگ قسمت کی کمی کی وجہ سے کامیاب نہیں ہو پاتے، اور بعض غیر اہل لوگ موقع سے فائدہ اٹھا لیتے ہیں۔

 شعر نمبر7:۔ وہاں جو لوگ اناڑی ہیں وقت کاٹتے ہیں   یہاں بھی کچھ متشاعر دماغ چاٹتے ہیں 

کرکٹ میں کچھ کھلاڑی محض کھیل کا وقت گزارنے کے لیے کھیلتے ہیں، مشاعرے میں بھی کئی شاعر ایسے ہوتے ہیں جو دماغ کا دہی بنا دیتے ہیں۔ یعنی ان کی شاعری کی کچھ سمجھ نہیں آتی۔ 

 شعر نمبر 8۔ ہوا کرے اگر اسکور اس کا زیرو ہے   یہاں جو شخص پھسڈی ہے وہ بھی ہیرو ہے 

کھیل اور مشاعرے دونوں میں بعض اوقات غیر متوقع نتائج ہوتے ہیں۔ کرکٹ میں اگر اسکور صفر ہے، تب بھی کچھ لوگ شہرت حاصل کر لیتے ہیں، مشاعرے میں بھی کبھی کمزور شاعر توجہ حاصل کر لیتا ہے۔

 شعر نمبر 9: مرے خیال کو اہل نظر کریں گے کیچ   مشاعرہ بھی ہے اک طرح کا کرکٹ میچ 

شاعر اپنے خیالات کی قدر کرنے کی امید ظاہر کرتا ہے۔ آخر میں وہ مشاعرے کو کرکٹ کے میچ سے تشبیہ دیتا ہے، جس میں مقابلہ، قواعد اور موقع کی اہمیت برابر ہے۔