غزل: کاش طوفاں میں سفینے کو اتارا ہوتا جماعت نہم

 غزل: کاش طوفاں میں سفینے کو اتارا ہوتا

شاعرہ: پروین بنا سید

سوال: پروین فنا سید کے انداز کلام کی چند خصوصیات تحریر کیجیے۔

جواب:

جذبات نگاری:

شاعرہ اپنے کلام میں جذبات کی گہرائی بیان کرتی ہیں۔ ہر شعر میں دل کے احساسات، محبت، غم، صبر اور روحانی کیفیت کی عکاسی واضح طور پر دکھائی دیتی ہے۔

محبت اور عشق کی گہرائی:

غزل میں عشق اور محبت کے پیچیدہ اور لطیف مفاہیم بیان کیے گئے ہیں۔ شاعرہ دکھاتی ہیں کہ حقیقی محبت میں قربانی، صبر اور برداشت شامل ہے۔

استعارہ اور تشبیہات کا استعمال:

طوفان، کشتی، ساحل، لہریں، گلشن اور پھول جیسے استعارے اور تشبیہات کے ذریعے زندگی، محبت اور مشکلات کے مفہوم کو خوبصورت انداز میں بیان کیا گیا ہے۔

سادہ اور سلیس زبان:

شاعرہ کا بیان آسان، واضح اور اثر انگیز ہے، جسے پڑھ کر ہر قاری جذبات سے جڑ سکتا ہے۔

 

سوال: پروین فنا سید کی غزل: "کاش طوفاں میں سفینے کو اتارا ہوتا" کی مختصر تشریح کیجیے۔

شعر 1:

کاش طوفاں میں سفینے کو اتارا ہوتا

ڈوب جاتا بھی تو موجوں نے ابھارا ہوتا

تشریح:

شاعرہ کہتی ہیں کہ کاش وہ زندگی کے طوفان یعنی مشکلات میں اپنا کردار ادا کر پاتیں۔ اگر کشتی   ڈوب بھی جاتی، تو موجیں یعنی حالات اسے دوبارہ اوپر لے آتیں۔ یہ شعر یہ سکھاتا ہے کہ زندگی کی مشکلات سے خوفزدہ نہیں ہونا چاہیے۔ انسان کی طاقت اور حوصلہ اکثر مشکلات کا سامنا کرنے میں چھپا ہوتا ہے۔ 

شعر 2:

ہم تو ساحل کا تصور بھی مٹا سکتے تھے

لب ساحل سے جو ہلکا سا اشارا ہوتا

تشریح:

شاعرہ اپنے جذبات کی شدت کو بیان کر رہی ہیں۔ وہ زندگی کے سمندر میں غرق ہیں اور محبوب کو پانے کی تمنا رکھتی ہیں، جسے ساحل کہا گیا ہے۔ لیکن محبوب کی بے رخی اور بے وفائی نے ان کے غم اور دکھ بڑھا دیے۔ شاعرہ کہتی ہیں کہ اگر محبوب نے ایک چھوٹا سا اشارہ کر دیا ہوتا، یعنی اپنی ناراضگی یا انکار ظاہر کر دیا ہوتا، تو وہ ساحل کی تمنا ترک کر کے اپنے دکھوں میں ڈوبنے کو ترجیح دیتیں۔

شعر 3:

تم ہی واقف نہ تھے آداب جفا سے ورنہ

ہم نے ہر ظلم کو ہنس ہنس کے سہارا ہوتا

تشریح:

یہاں شاعرہ محبت کے آداب اور صبر کی اہمیت پر زور دیتی ہیں۔ وہ کہتی ہیں کہ اگر محبوب جفا یعنی ظلم کے آداب جانتا، تو دیکھتا کہ وہ کس حوصلے اور صبر کے ساتھ ہر دکھ سہہ رہی ہیں۔ یہ شعر ہمیں یہ سکھاتا ہے کہ حقیقی محبت میں انسان برداشت اور قربانی کے جذبے سے ہر مشکل قبول کرتا ہے۔

شعر 4:

غم تو خیر اپنا مقدر ہے سو اس کا کیا ذکر

زہر بھی ہم کو بصد شوق گوارا ہوتا

تشریح:

شاعرہ کہتی ہیں کہ زندگی کے دکھ اور غم مقدر میں شامل ہیں، اس لیے ان پر شکایت کرنے کی ضرورت نہیں۔ اگر عشق میں کوئی شدید تکلیف یا آزمائش، جیسے زہر پینا بھی آتی، تو وہ اسے بھی خوشی خوشی قبول کر لیتی۔

شعر 5:

باغباں تیری عنایت کا بھرم کیوں کھلتا

ایک بھی پھول جو گلشن میں ہمارا ہوتا

تشریح:

یہاں شاعرہ خدا یا قدرت کو باغباں کہ کر مخاطب کر رہی ہیں اور شکوہ کر رہی ہیں کہ اگر 

خدا واقعی مہربان ہوتا، تو ان کی زندگی میں کم از کم ایک خوشی یا کامیابی )پھول ( ضرور ملتی۔یہ شعر محبت میں ناکامی، مسلسل مشکلات اور غم کے سبب انسان کے دل میں پیدا ہونے والے شکوے اور احتجاج کو ظاہر کرتا ہے۔ 

شعر 6:

تم پر اسرار فنا راز بقا کھل جاتے

تم نے ایک بار تو یزداں کو پکارا ہوتا

تشریح:

شاعرہ کہتی ہیں کہ اگر انسان ایک بار خدا کو سچے دل سے پکارے، تو زندگی اور موت کے راز اسے سمجھ آ جاتے۔

شاعرہ یہ سکھاتی ہیں کہ روحانی تعلق اور خدا کی یاد انسان کی زندگی کے حقیقی راز کھولتی ہے اور اسے زندگی کا مقصد سمجھنے میں مدد دیتی ہے۔